Ehrenämterbitten 10.10.2026

Bitten der Festbraut 

Hannah Schmid

Hannah du host es bestimmt scho g‘hört, es wird ja vui g‘red
dass d‘Ansdorf-Simperinger Feuerwehr 100 Johr oid werd.

Da Spuimannszug, des is gwis,
dann 75 Johr oid is.

So mancher Abend is scho voganga,
für‘s Fest bring ma awei mehra Punkte zamma!

Planen dumma seit zwoa Joh scho dro,
oba a Festbraut, de brauchat ma no.

Und dann is da Festausschuss wieda zamma kemma,
zum spekuliern und zum nachedenga.

Vo vornherein ham mir ins Auge g‘fasst
dass nur a jungs, hübschs Deandl ais Festbraut in‘s Buidl passt.

So möchte i den heidigen Tag zum Anlass nemma
und ganz formell zur entscheidenden Frage kemma.

Möchst du Hannah unser Bitt erhöhrn
und für unser Gründungsfest de Festbraut wern?

Bitten der Festmutter

Cornelia Berlinger

Conny, du stehst heut auch in unserer Mittn.
Ned umersunst, weil auch zu dir kemma heute zum Bitten.

Unser Gründungsfest braucht a Festmutter, des is uns allen klar.
Gsagt hamma, es soll wer sein, der immer hinter uns steht und uns bei Rat und Tat zur Seite steht.

I hoff du sagst heute zu unserer Bitte Ja,
und bist während der Festtage für uns alle da.

Für unser Fest brauch ma a Festmutter auf de wir uns kinnand immer verlousn,
de sich kümmert um unsere Leid und Gäste, um de Gloan sowie a um de Groußn.

Zum Organisieren bei unserm Fest gibt’s sehr Vieles, des is uns allen bewusst,
Drum hoff ma mir, dass du hast auf diese Aufgaben zam mit uns a große Lust.

Desweng mecht i dich im Namen von uns allen frong,
ob du des Amt als Festmutter bei unsan Fest dasd drong.

Dou uns bitte an großn Gfoin und sog heut ja,
Dann warad ma an Schritt weiter bei de Planungen fürs Fest nagds Jahr

Bitten der Patenbraut

Michaela Maurer

Michaela, wie du sicha woast, brauchma mir für unser Fest nagsds Joh a Patenbraut,

de sich 4 Tage mit uns unser Fest feiern traut.

An Bezug zur Feierwehr, den host du, des is allen klar.

Bist a aktives Mitglied in der Feuerwehr und wemma braucht wern, bist a immer glei da.

Drum hamma dich heut eiglont um zum frong,

ob du als Patenbraut des Bandl dasd drong.

Heut frog i di, Michaela, willst du unsere Patenbraut sein?

Dei „Ja“ dat uns alle zam scho narrisch gfrein.

Bitten des Schirmherrn

Karl Heinrich Brandl

Ihr wisst‘s es ja scho lang, mia plan ma next‘s Johr im Summa a Fest.
Aus dem Grund san ma do und ham a graoße Bitte jetzt.

Uns gaid zum Fest hoid da Schirmherr no o,
mia möchten oan, dea hinter uns staid und a opacka ko.

Deshoib ham mia im Festausschuss g’sagt,
do wird ais easta da Karl Heinrich Brandl g‘fragt.

Weil‘s bei uns koan gibt, dea des bessa kannt,
da Karle ais Schirmherr des waar hoid gwand.

Mia dad ma sogoa in d‘Gnai obe geh,
mia bitt‘n die recht herzlich und schee.

Sei unser Schirmherr beim Feierwehrfest,
wir bitt‘n de wirklich ganz fest.

Dou de oba ned z‘lang scheniern,
sonst maes ma uns no freiwillig nieda k‘nian.

Drum nimm den Schirm und spanna af,
dann nimmt des Fest gwis an guadn Laf.

Dei Frau schaut mi scho ganz kritisch o
und denkt se, oi oi oi oi, scho wieda vier Tog koan Mo.

Drum dad ma mia dia de Blumen überreicha
und Dankschön song für‘s leiha.

Aufgaben

Aufgabe der Festbraut: Parcours der Festleiter

Aufgabe der Patenbraut: "Suppe auslöffeln"

Aufgabe der Festmutter: Rohes Ei durch Feuerwehrschlauch

Aufgabe des Schirmherrn: "Skifoahn"